Hassan Khalil
24 ديسمبر 2021 ·
جماعة البرانيط
ببساطة.
البلد ممسوك من جماعة البرانيط.
كل ما تعركست شوية، بيطلعوا أعضاء المنظومة بتصريحات انو ما في غير المرجع الفلاني، والمرجع الفلاني. وهيدا العاقل المتوازن، اللي بيعرف يدور الزوايا.
هو حكيم التسويات، وهيدا وهيدا وهيدا. وبيطلع أرنب من برنيطة. بيطير رئيس حكومة وبيجي غيره، وبيكمل الفيلم.
بهالوقت في ابو برنيطة وارانب تاني دائم لخدمة كل الحكومات والمجالس النيابية.
برنيطة وارانب الدولار والليرة.
شوفوا اليوم هالارنب اللي طلعوا من البرنيطة:
بدل ما يزيدوا الرواتب بالليرة، العملة الرسمية للرواتب، فجأة قرر هو ورئبسي الحكومة والنواب انو يدفعوا الرواتب بالدولار. قانوني او غير قانوني؟ مش مهم؟ اصلا الثلاثي القضائي بخبر كان..وبامر الثلاثي الأخر..
الانتخابات قربت. وانا البنك المركزي بخدمتكم.
مش صرحت من كم يوم انو انا امنت استقرار النظام ٢٧ سنة. بيقدر كمل كم شهر. شو المشكلة.
يعني شو المشكلة إذا طبعنا كم ليرة زيادة واعطيناهم للموظف. بس لازم نعملها بطريقة اولا تذله شوية، وتانيا يشعر حاجته لنا.
كيف؟
بنعطيه راتبه اللي بالليرة، بنعطيه بالدولار على سعر احسن من السوق السوداء. هو بيروح على البنك بذل، وبيأخذ الدولارات وبيركض عند صراف بيقلبهم بيرجع لليرات على سعر أعلى.
هيك بيشعر انو استفاد من حساب الدولة.
كل العملية بتكلفنا حوالي ٢٠٪ طبع ليرات زيادة بالرواتب عن اللي عم نطبعه عادة.، واللي هي الفرق بين سعر الغش اللي نغريهم فيه، وسعر السوق السوداء، اللي موجودة وما بنعترف فيها، بس بنشتري دولاراتنا منها. شو المشكلة؟
طبع طبع طبع ونشتري الناس قبل الانتخابات. ومن مالهم…
هني يا مواطن بتعرفهم. انت يا مواطن بريء مظلوم منهوب مقموع مسروق مذلول،انت شو رح تعمل؟
رح ترجع تصوت لهم؟
قرارك هو بقاء لبنان او زواله.
هو بقاء عائلتك او تشتتها؟
شو رح تعمل؟
حسن أحمد خليل، تجمع استعادة الدولة
