٧ كانون الثاني ٢٠٢٦ سمعتوا.. شفتوا.. صدقتوا..

سمعتوا.. شفتوا.. صدقتوا..
العمى.. شو ممكن يا ناس يهزكم..
ابو عمر.. او تعليمة صحيحية؟
تفوه.. تفوه..
اسمعوا القصة..

سمعتوا النائب احمد الخير ومحمد سليمان في الشهادة امام المدعي العام الحجار؟ سمعتوا مقابلة غسان سعود؟
~بتتذكروا انو نواف سلام قبل كم يوم من تعيينه سافر وقال للقريبين منه انو القرار هو تسمية ميقاتي.. ولا امل له… قرار من؟
قصده برا.. هذا رئيس سيادي جديد..؟؟
~ بتتذكروا انو رئيس الجمهورية قال في محيطه الضيق انو الحكومة محسومة لميقاتي..
~بتتذكروا انو ميقاتي قال في مقابلة انو كان اجتمع مع رئيس الجمهورية قبل الاستشارات، واتفقوا على اسماء الوزراء، ١٥ منهم وزراء في الحكومة الحالية.. وطبعا هيدا ما بيصير بدون ختم ديوان عين التينة..
~وبتتذكروا انو قبل ليلة بس، كان مخزومي ضامن ٣٦ صوت لانو كان مرشح القوات وريفي ومجموعة “سياديين”..
~وبتتذكروا انو اول نائبين سنّة طلعوا على القصر، عبد الرحمن البزري وبلال الحشيمي، سموا ميقاتي.. لانو ما سمعوا عن “تعليمة”..

فجاة.. تغير التصويت.. وراح الكل باتجاه نواف..
يقال رئيس الجمهورية انصدم.. بس التزم دستوريا..
رئيس المجلس اللي صديقه الصدوق الشخصي لميقاتي، انصدم.. بس استنتج انها هي الرغية الخارجية..
بعض النواب اللي تم الحديث معهم قبل ليلة، وقالوا انهم حيصوتوا لميقاتي، طلعوا بعد الظهر واعطوا نواف…

طيب كيف هيك؟ وليش هيك؟ وشو النتيجة..

صدفة في مقالتي البارحة وصفت اللبنانيين بالروبوتات..
كان وصف لطيف..
اللبنانيين بشر.. لكن عبيد وكريهين.. حتى مش عبيد غاليين.. عبيد رخيصين.. اوقات بيتطوعوا ببلاش وحتى بيدفعوا مصاري ليعملوا عبيد..

حتى لو زعيم جبار..
حتى لو ملياردير..
هيدا زعيم ماروني كل مرة بمقابلة، بتفكره ريكاردو قلب الاسد بفتوحات صليبية..
وهيدا زعيم شيعي حاكم بامره البلد، والطائفة، والحركة، والحزب اللي هني بيجيبوه له ال٢٧ نائب.. “والجمهورية انا”..
وهيدول زعماء ونواب اهل السنة و”تكبير”، وضد الرافضة والسلاح ووو.. بس ناطرين تعليمة..

تصوروا، وبغض النظر، اذا قصة ابو عمر صحيحة او مبالغ فيها،انو هو من سبب تغيير سفينة التصويت.. او فعلا تعليمة خارجثة.. ووصل نواف..
كيف اليوم بيكون شعور نواف، قاضي القضاة، بس عرف انو صار رئيس حكومة بالغلط..

تعليمة خارجية.. ذل وإذلال..
ابو عمر السني.. غباء وحقارة ورخص..
وفي ابوعمر الاشقر وعيون زرق وخضر..
وابو عمر الشيعي والدرزي.. في “من جميعه”

تبين اليوم بالدليل القاطع المعروف من زمااان انو اغلب السياسيين في لبنان، مش قرطة “سياديين”، بل “صيادين وقناصين” ..
سياديين مصوا دم المسيح ومحمد والخلفاء وعلي والحسين.. وما بيعرفوا الله..
وتبين بالدليل القاطع الجازم الحازم، انو كتار كتار من انصارهم اللبنانيين أسوأ من البهائم اللي بتلحق غرائزها الكريهة، وعاملين من مجموعة بعضهم قتلة وحرامية، عاملين منهم انبياء وزعماء ووزراء ونواب.. وبيحكوا عن “نحن المسيحيين، وما بيشبهونا” و “شيعة شيعة” و “اهل السنة وتكبير”..
تبين انو فعلا كلهم بيشبهوا بعض.. وانو لبنان مزرعة بهائم ودجاج وحتى صيصان..
شعب قبلان وبينتخب وبيمجد ويقدس جماعة ناطرين تعليمة، او بيطيروا بطيارات خاصة للعواصم، لياخذوا تعليمات..
رئيس جمهورية نفسه بيقول انو لبنانيين هني اللي بيبثوا السم في الخارج على لبنانيين.. وصادق..
شو في دليل اكثر..

ذكرت لكم عدة مرات انني شاهدتهم بعيني في الدوحة سنة ٢٠٠٩.. طيور منتوفة في لوبي الشيراتون، ولغاية ما دحشوهم مع بعض كلهم في طيارة عادية صغيرة Airbus A21..
وفلشوا طواويس منفوشة بس وصلوا عمطار بيروت..

بغض النظر اذا ابو عمر هو من سبب تسمية نواف سلام او كانت فعلا تسمية خارجية، لو في حد ادنى من الكرامة لازم فورا هذه الحكومة تقدم استقالتها.. ويحفظ نواف سلام حد ادنى من رصيده كقاضي سابق.. طبعا مش حيحصل..
ولو في شعب عنده حد ادنى من الكرامة وليس غنم واقل من غنم، كان اليوم بيكون مصدوم وبيحاسب. لازم ما يشوف ولا وجه من هالوجوه المكربة الكريهة الموجودة في المجلس النيابي..
طبعا مش حيحصل..

للاسف.. ما حدا يتوهم.. ولا شيء من هيدا حيحصل..
بكرا بتعليمات من الدولة العميقة للقضاء الفاسد، بينعطى تعليمات للفلفة الملف، وتاجيل الجلسات، وتمييع القضية.. ويا دار ما دخلك شر..

هلق عرفتوا ليش عم يتسكر ملف الودائع
وليش في قضاء فاسد، وما في تدقيق جنائي؟

وبترجع الناس اللي عايشة بالمزرعة اللي اسمها لبنان، الناس اللي بلا عقول، بتروح عالمطاعم لعلف البطون.. ونفخ الاراغيل..
تفوه ونص..

٧ كانون الثاني ٢٠٢٦
حسن أحمد خليل