يا الله..
*اسئلة للبنانيين من خلال الله..*
اسئلة يا الله لو سمحت تسالها لكل اللي بيدعوا انك بتحبهم اكثر من غيرهم..
سؤال لكل اللبنانيين اللي بيقولوا هيدا لبنان هيك وما بيتغير.. وانو هو بلد طوائف ومذاهب.. سؤال “للفينيقيي” والحضارة والثقافة المختلفة” والفيدرالية..
طيب اللبناني العلماني اللي ما بدو يكون عنده طائفة، او الملحد، وين بيعيش؟ هل بيتزعوا عنه الجنسية اذا رفض يكون مسجل على مذهب ما؟
ثم عم نسمع انو الفيدرالية مهندسة على اساس” مسيحيي” وشيعة وسنة ودروز..
السؤال ليش ما مقسمة مثلا على اساس مسلمين وموارنة وارثوذكس وكاثوليك؟ مثلا؟ مين “النابغة” اللي قرر التوزيعات؟
ثم حدا استشار الارثوذكس والكاثوليك والارمن وغيرهم، اذا فوضوا حدا يحكي باسمهم، او بدهم يكونوا مدموجين مع الموارنة مثلا؟والعكس؟
وحدا سأل “السنة” اذا اهل بيروت البيارتة بدهم يكونوا مع اهل طرابلس وصيدا؟والعكس؟
وحدا سأل “الشيعة” اذا اهل الجنوب بدهم يكونوا مع اهل البقاع؟والعكس؟
وحدا سأل التيار والمردة اذا بدهم يكونوا مع القوات والكتائب؟والعكس؟ او اذا القوات بتطيق الكتائب والعكس؟ حدا سأل اذا في زعيم ماروني بيطيق زعيم ثاني وبالعكس؟ مثلا نسينا. شو بنعمل بفارس سعيد مثلا؟
وحدا سأل اهل زغرتا واهدن اذا بدهم يكونوا مع اهل بشري؟والعكس؟
وحدا سأل اذا اهل الحركة بدهم يكونوا مع اهل الحزب…؟ والعكس؟ او اذا في شيعة ما بدهم يكونوا مع الحركة والحزب معا؟ وهل بيكون الاعلام الخضر اكثر او الصفر..؟
ووووو… حدا سأل اذا حدا بدو يكون مع حاله او بيطيق حاله ؟بركي الحل ١٠الاف كانتون بال ١٠الاف كم٢.. او كانتون لكل حزب وحركة وتيار و”بيت سياسي عريق”..
كلكم مش طايقين حدا ولا حدا طايق حدا..
*طيب. حدا سأل اللي مثلنا، واللي بيعتبروا كلكم ما بتنطاقوا،… وين بيروحوا؟ انا مني واحد، كمان بدي كانتون لحالي..*
شو؟ بيمشي الحال؟ تذكرت ايام الصيف بياع الكميون: معانا طناجر.. معانا صحون معانا كبايات.. معانا فناجين قهوة..
معانا طوائف معانا مذاهب معانا حضارات وثقافات.. معانا حمص وتبولة.. معانا منافقين.. معانا بهايم..
١٥ أيار ٢٠٢٦
حسن أحمد خليل
