الاحد (١)
فقط في لبنان..
نشر الغسيل..
البنك الدولي و٣ رئاسات؟ شو هالظاهرة السر؟
تعود الشعب والاعلام على كل الشواذات.. مثلا :
ليش وفد البنك الدولي بيزور ٣ رئاسات. وكل رئاسة بتعمل شرح presetation لوفد بنك، ولو دولي..
يا جماعة انتو رئاسات. والوفد مجرد موظفين بنك.. شو هيدا؟ والله ما منيحة لهيبة الدولة. كمان والله الاجانب ما بيتوقعوا كل هيدا. ليش بس بلبنان هالشواذ الغلط؟
ثم ليش ٣ شروحات من ٣ فرق ل٣ رئاسات.. لكل رئيس فريقه.. كيف بدهم يحترموا وزير ماليتكم والوزراء بهالحالة؟
بعدين اذا ال ٣ شروحات متطابقين، ليش الشروحات من فرق ال٣ رئاسات إذن.. مش لائقة فيكم..
بس المصيبة اذا كانوا ال ٣ شروحات مش متطابقين. هونيك الجرصة والفضيحة.. ومش لائقة فيكم وببلدكم وبلدنا..
متى حتخلص همروجة ال٣ رئاسات وال٣ رؤوس، بينما الرئيس الفعلي اللي بيقرر برا… بس تخلص الطوائف وتخلص الدني..
اين اللبناني بدون طائفة، ومطلبه رئيس واحد مش ٣ رؤساء.. و٣ جمهوريات..
(ملاحظة: حدا من فرق الرئاسات تجرأ وشرح للبنك الدولي شو عم يحاول يعملوا البنك المركزي والمصارف لتعويم البنوك المفلسة على حساب المودعين؟ يا ويلي.. انشاالله لا. هونيك الجرصة.. لان البنك اادولي وصندوق النقد عارفين البير وغطاه.. )
٩ تشرين الثاني ٢٠٢٥
حسن أحمد خليل
الاحد (٢)
مفاجاة.. الحل قريب.. من البطريركية ودار الافتاء..
هل سمعتم ان جيروم باول حاكم البنك الاحتياطي المركزي في اميركا، زار رئيس الكنيسة البروتستانية، بعد زيارته مرجعيات دينية اخرى، وبحث معهم امكانية تخفيض الفائدة بعد السيطرة على التضخم…
في لبنلن زار حاكم البنك المركزي الماروني المفتي، ومعه سويدان السني.. ما كان في غير طوائف بالزيارة..
ومتوقع، ليكمل الحل، وبعد زيارته للبطريركية المارونية، ان يزور، برفقة نائبه منصوري الشيعي، (اللي علاقته معه مش ولا بد، لدرجة اختفى منصوري بعد تعيين سعيد)، رئيس المجلس الاسلامي الشيعي الاعلى، اللي مش موجود اصلا من سنوات، بسبب “وحدة” الثنائي الشيعي.. بس بيمشي الحال بزيارة نائب الرئيس الموعود من سنين وسنين مثل غيره كل مرة.. .
بعد هالزيارات بيسمعوا اللبنايين عن الخطة الجهنمية اللي عم يبحثها الحاكم مع المرجعيات الدينية.. خاصة ما يتعلق بتعويم بعض المصارف للمرة العاشرة، وبيعع الذهب اللي مش معروف كمياته، واذا موجود ام لا..
وبتتدفق شلالات الدولارات.. وودائع وسد فجوة وازدهار ونمو.. بس بدها صبر شوية.. كم ١٠٠ سنة بس..
دخيلكم ما ينسى زيارة شيخ العقل وبطريرك الارثوذكس والارمن..
وبيباركوا رجال الدين بالحاكم وبجهوده..
شو رايك يا حضرة الحاكم تزور اب او ام بعيدين عن اولادهم او مريض سرطان يموت بسبب سرقة اموالهم؟
٩ تشرين الثاني ٢٠٢٥
حسن أحمد خليل
